9.5 milionë euro investime kapitale, kritikohet Komuna e Prishtinës

Pak para ka shpenzuar Komuna e Prishtinës për investime kapitale gjatë nëntë muajve të këtij viti, pavarësisht nevojës së madhe që, sipas opozitës, ka kryeqyteti për përmirësim të infrastrukturës

Sipas raportit financiar të Komunës, nga 48 milionë euro sa janë në dispozicion për këtë kategori, janë shpenzuar vetëm 9 milionë e 456 mijë euro, apo 19.55 për qind, raporton 038 në KTV, përcjell albinfo.ch.

Shpenzimet për investime kapitale kanë rënë për 15.9 për qind, krahasuar me periudhën e njëjtë të vitit 2018, ku për nëntë muaj ishin shpenzuar 35.45 për qind të mjeteve për këtë kategori.

Kjo shumë e buxhetit e shpenzuar për investime kapitale këtë vit, sipas LDK-së, është shumë e ulët.

Kjo parti opozitare thotë se komunës sivjet do t’i mbesin pa i shpenzuar 40 milionë euro, rreth 15 milionë më shumë se vitin e kaluar.

Këtë gjendje, Lëvizja Vetëvendosje e vlerëson si fatkeqësi për kryeqytetin e vendit.

Eman Rrahmani nga kjo parti ka kërkuar dorëheqjen e kryetarit Shpend Ahmeti.

Iniciativa për Progres, e cila monitoron punën e komunës, thekson se ky nivel i ulët i shpenzimeve kapitale është si pasojë e keqplanifikimit dhe keqmenaxhimit të projekteve.

Sipas raportit, ka drejtori si ajo e Shërbimeve Sociale që për këta nëntë muaj nuk ka shpenzuar asnjë cent për projekte.

Kryetari Shpend Ahmeti ka siguruar se paratë nuk do të mbesin pa u shpenzuar, pasi ato do të barten në buxhetin e vitit të ardhshëm.

“Ashtu siç kam thënë në dhjetor të vitit të kaluar, kur ishin në pyetje mbi 20 milionë, pjesa më e madhe e tyre janë shpenzuar sivjet. Pra, ky nuk është suficit, por bartje e mjeteve që ndodh çdo vit”, ka thënë Ahmeti.

---