Enis Alushi, futbollist i vitit në Kosovë

Anëtari i skuadrës St Pauli në Bundesliga 2, Enis Alushi, është shpallur futbollisti më i mirë kosovar për vitin 2015, sipas FFK-së. Përveç medieve shqiptare, për këtë çmim të fituar kanë shkruar edhe mediet gjermane, respektivisht sport1.de.

Federata e Futbollit e Kosovës në hotel “Emerald” me një ceremoni ka bërë shpalljen e laureatëve për vitin 2015., ku ishin të pranishëm shumë personalitete të larta nga jeta politike e sportive e Kosovës, kryetarë e përfaqësues të federatave mike dhe mysafirë të shumtë. Të pranishmit i ka përshëndetur dhe u ka uruar mirëseardhje kryetari i FFK-së, z. Fadil Vokrri.

Alushi ishte në konkurrencë së bashku me lojtarët e tjerë të Kosovës, si Bernard Berisha, Fanol Perdedaj, Besar Halimi e Alban Pnishi, por shumica e votave shkuan për Alushin.

Bashkëshorti i futbollistes shqiptare në Gjermani, Fatmire Alushi, u nderua me këtë çmim të shtunën në kryeqytetin e Kosovës, në Prishtinë.