Shërbimi i obliguar ushtarak mbetet ende në fuqi

Me 16 vota kundër dhe 8 pro, është hedhur poshtë nga komisioni i përmendur një nismë për heqjen e shërbimit të detyruar ushtarak

Përderisa në disa vende të Evropës perëndimore ka kohë që nuk ekziston më shërbimi i obliguar ushtarak, në Zvicër edhe vetëm iniciativat parlamentare në atë drejtim janë të dënuara me dështim. Kështu shkruan nzz.online, duke iu referuar një iniciative të tillë në komisionin për çështje të sigurisë të Parlamentit Federal të Zvicrës.

Me 16 vota kundër dhe 8 pro, është hedhur poshtë nga komisioni i përmendur nisma për heqjen e shërbimit të detyruar ushtarak, e ndërmarrë nga deputetja e Partisë Socialdemokrate, Evi Allemann.

Shumica e cila kundërshtoi iniciativën pati për bazë frikën se me futjen e sistemit të ushtrisë vullnetare, ushtria do të humbte lidhjen e saj me shoqërinë. Sipas kundërshtarëve po ashtu shërbimi i detyrueshëm ushtarak ka rëndësi bazike për ushtrinë dhe ka peshë të madhe për unitetin nacional të zviceranëve.

Mbështetësit e iniciativës, nga ana tjetër, konsiderojnë se ndërrimi i sistemit është i pashmangshëm. Sipas tyre ushtria është tepër e madhe ndërsa mbajtja e saj shumë e kushtueshme.