Hasi prezantohet në Legia

Besnik Hasi është zyrtarisht trajneri i ri i Legias së Varshavës.

Besnik Hasi është zyrtarizuar të premten mbrëma, duke nënshkruar kontratë 2-vjeçare me Legian e Varshavës, shkruan albinfo.ch.

Hasi ditë më parë i dha lamtumirë klubit të Anderlehtit. Pas largimit nga belgët, Hasi pati oferta nga disa klube, por ish-futbollisti i Kombëtares firmosi për Legia Varshavën.

“Kam kaluar 14 vite të bukura me këtë fanellë si lojtar, asistent-trajner dhe trajner i parë. Ky klub do të jetë gjithmonë në zemrën time.

Dua të falënderoj presidentin dhe bordin për mundësinë që më kanë dhënë. Gjithashtu, dua të falënderoj bashkëpunëtorët e mi, i jam mirënjohës për përkushtimin”, tha 44-vjeçari pas largimit nga ekipi i Anderlehtit.