Bild: Fisnik Asllani pranë transferimit te RB Leipzigu për 30 milionë euro

Sulmuesi kosovar pritet ta kompletojë kalimin nga Hoffenheimi brenda këtij muaji, ndërsa në garë për të ishin edhe Barcelona dhe Borussia Dortmundi.

Sulmuesi i Hoffenheimit, Fisnik Asllani, është shumë pranë një transferimi te RB Leipzigu, raporton gazeta prestigjioze gjermane Bild.

Sipas mediumit gjerman, 23-vjeçari pritet ta kompletojë kalimin te klubi nga Saksonia para përfundimit të këtij muaji.

Leipzigu është i gatshëm të aktivizojë klauzolën e lirimit prej 30 milionë eurosh, e cila është e përfshirë në kontratën e Asllanit me Hoffenheimin dhe është e vlefshme deri në vitin 2029.

Për reprezentuesin e Kosovës kishte shfaqur interes edhe Barcelona, e cila e konsideronte atë si alternativë në rast se nuk arrinte të transferonte objektivin kryesor, Julian Alvarez nga Atletico Madridi.

Ndërkohë, edhe Borussia Dortmundi e kishte në listën e dëshirave, por klubi verdhezi duhet fillimisht të krijojë hapësirë në skuadër dhe në buxhetin e pagave përpara se të bëjë një ofertë konkrete.

Me zhvillimet e fundit, RB Leipzigu shihet si favoriti kryesor për të siguruar shërbimet e njërit prej sulmuesve më premtues të Bundesligës.

---