Kapet shtetasi zviceran, i dyshuar për kontrabandim me migrantë

Policia kosovare ka kapur të martën në aeroportin ndërkombëtar “Adem Jashari” në Prishtinë një person me shtetësi zvicerane. Bëhet fjalë për P. A. nga Gjilani. I njëjti ishte i kërkuar nga policia.

“Për personin e dyshuar ka ekzistuar dyshimi i bazuar se i njëjti kohë më parë ka kryer vepër penale “Kontrabandim me migrantë”, vepër penale kjo e sanksionuar në bazë të Kodit Penal të Republikës së Kosovës, neni 170”, thuhet në një njoftim të policisë.
“I njëjti dyshohet se me qëllim të përfitimit material, shtetasve kosovarë iu ka siguruar leje qëndrimi zvicerane të falsifikuara, me qëllim të kontrabandimit të tyre drejt vendeve të BE-së, ku për secilin dokument të falsifikuar dyshohet se ka përfituar nga 2500 euro”, thuhet më tutje në njoftim.

Pas konfiskimit të dokumentacioneve, Agjencia Kosovare e Forenzikës ka bërë ekzaminimin e tyre dhe të njëjtat kanë rezultuar të falsifikuara.

I dyshuari është dërguar në mbajtje deri në 48 orë.