Ambasadori Malaj ngushëllon ambasadorin e Japonisë në Zvicër

Ambasadori i Republikës së Kosovës në Zvicër, z. Naim Malaj, me rastin e fatkeqësisë së madhe që ka goditur Japoninë, i ka drejtuar një letër ngushëllimi z. Ichiro Komatsu, Ambasador i Japonisë në Zvicër.

Në letrën, përmbajtjen e të cilës Ambasada e Kosovës e përcjell përmes një komunikate për medie, z. Malaj shpreh dhembjen që edhe populli i Kosovës e ndan me gjithë njerëzimin, për kohën e rëndë nëpër të cilën po kalon Japonia.

Në letër, veç tjerash thuhet: “Me një tronditje dhe trishtim të madh jemi njoftuar me lajmin e hidhur për shkatërrimin e tmerrshëm nga tërmete dhe cunami që kanë goditur Japoninë duke shkaktuar një numër të madh të viktimave. Në këto rrethana tragjike, në emër të Ambasadës së Kosovës në Zvicër, si dhe në emrin tim personal, ju shpreh ngushëllimet tona më të sinqerta për humbjen e jetëve të shumë qytetarëve japonezë, viktima të një katastrofe natyrore. Ju lus gjithashtu që t’ua përcillni ngushëllimet tona më të thella familjeve dhe të afërmve të viktimave”.

Ambasadori kosovar më tutje siguron homologun e tij japonez edhe për gatishmërinë e shtetit të Kosovës që brenda mundësive të ndihmojë miqtë e mëdhenj japonezë.

“Kosova bashkëndjen me dhimbjen e familjeve të viktimave dhe të të zhdukurve. Të jeni të bindur, Shkëlqesi, se Kosova do të jetë një përkrahëse e fortë e Japonisë dhe është e gatshme për të ndihmuar me mjetet e saj modeste shtetin tuaj për t’i përballuar kësaj tragjedie që ka tronditur gjithë botën”, përfundon letra e ngushëllimit që ambasadori i Republikës së Kosovës, Naim Malaj i ka drejtuar ambasadorit të Japonisë në Zvicër z. Ichiro Komatsu.