Zvicra kërkon fitore përballë Francës

(KEYSTONE/Jean-Christophe Bott)

Zvicra do të ketë ndeshjen më të vështirë deri më tani, ku do të takohet me Francën, organizatoren e Evropianit, sonte në mbrëmje. Për këtë takim kanë folur dy futbollistët shqiptarë, Granit Xhaka, Blerim Xhemaili dhe trajneri Vladimir Petkoviq, shkruan albinfo.ch.

Granit Xhaka ka thënë se duhet të luajnë në mënyrë agresive. “Ky rezultat mund të ndikojë në fatin e turneut. Është e qartë se nuk ka ekipe të vogla në këtë Evropian. Të gjitha luajnë në mënyrë agresive dhe të gjitha duan të kualifikohen. Ne kemi fatin në duar tona”, deklaroi mesfushori me prejardhje nga Prishtina.

Blerim Xhemaili shpresojnë që të kenë sukses më të madh se dy vite më parë kur pësuan 5:2 nga Franca. “Unë kam pasur pengesa me lëndime, që kanë ndikuar edhe në Kombëtare, por unë kurrë nuk jam dorëzuar. Kam besuar dhe kam luftuar deri në fund. Jam shumë i lumtur që ajo periudhë e vështirë ka kaluar. Do të shohim nëse jemi përmirësuar nga Kupa e Botës, por sigurisht kemi mësuar shumë”, theksoi ai.

Trajneri Vladimir Petkoviq thotë se kanë fatin në duar. “Rezultati i lojës do të varet nga ne. Ne do të përqendrohemi në lojën tonë. Si ndaj Rumanisë. Ne kemi pasur shumë raste dhe këto duhet t’i shfrytëzojmë. Do të jetë një ndeshje mjaft e bukur”, u shpreh Petkoviq.