Zvicër: Rritje drastike e numrit të martesave me detyrim

Vetëm gjatë gjashtë muajve të këtij viti janë regjistruar 26 raste të martesave të dhunshme të vajzave nën 16 vjeçe. Kjo shifër është shumëfish më e lartë se ajo e viteve të kaluara: nga viti 2005 deri në vitin 2015 janë paraqitur gjithsej vetëm 5 raste të tilla

Numri i martesave me detyrim në Zvicër ka shënuar një rritje drastike. Veçanërisht shqetësuese është rritja e numrit të vajzave të mitura, pa i mbushur as 16 vjeçare që martohen me dhunë.

Karta e të Drejtave të Njeriut e OKB-së ashtu si dhe shumica e shteteve të botës, e dënojnüe martesën e të miturve. Por, megjithatë, në Zvicër vetëm në shtatë muajt e parë të këtij viti janë regjistruar 119 njoftime për martesa të detyruara me vajza të moshës së mitur, shkruan «NZZ am Sonntag». Këto njoftime i jep Qendra profesionale për martesat me detyrim, me seli në Cyrih. Nga këto martesa, 26 janë bërë me vajza që janë nën moshën 16 vjeçare, përcjell albinfo.ch. Shumica e këtyre vajzave janë me prejardhje nga Iraku, Siria, Eritrea, Afganistani dhe Somalia.

Ndër rastet e tilla të rënda është ai i vajzës, për të cilën mjekja zvicerane që e trajtonte kishte menduar se kishte pësuar dhunim seksual. Por më vonë u mor vesh se vajza ishte martuar me detyrim! Rasti tjetër, ështüe ai i somalianes 10 vjeçare, e cila ndiqte shkollën në Zvicër por ndërkaq e kishin martuar.

Është tmeruese e dhëna që tregon se vetëm gjatë gjashtë muajve të këtij viti janë regjistruar 26 raste të martesave të dhunshme të vajzave nën 16 vjeçe. Kjo shifër është shumëfish më e lartë se ajo e viteve të kaluara. Sa për krahasim: nga viti 2005 deri në vitin 2015 janë paraqitur gjithsej vetëm 5 raste të tilla, transmeton albinfo.ch. Kjo i bie që për 6 muaj ka pasur 5 fish më shumë martesa të detyruara se sa për 10 vite të plota!

Por, Anu Sivaganesan, udhëheqësja e qendrës profesionale të përmendur thotë se ky shtim numri nuk ka të bëjë me rritjen e numrit të refugjatëve. Ajo e shpjegon këtë ngritje me sensibilizimin më të madh të shoqërisë dhe me popullarizimin gjithnjë më të madh të qendrës që ajo udhëheq.

Megjithatë, Sivaganesan kërkon që Zvicra t`i trajtojë më seriozisht këto raste. Sipas saj, më së miri do të ishte që të ndiqej shembulli i Holandës. Atje shpallen të pavlefshme të gjitha martesat e bëra në mes të të miturve, edhe kur ato janë bërë në vendet e prejardhjes.