Embolo si shqiptarët: Edhe ai bën shqiponjën!

I udhëhequr nga Avdijaj, Embolo ka arritur ta bëjë më mirë se dy bashkëlojtarët tjerë dhe duket se argëtohet mirë me këtë veprim. “Duket sikur të kishte marrë leksione plotësuese nga miku i tij i ngushtë nga FC Baseli, Taulant Xhaka”

A do ta “rrezikojë” tash vendin e tij në kombëtaren zvicerane? Talenti i madh i futbollit zviceran me rrënjë afrikane Breel Embolo, “ka bërë shqiponjën” me duar, për t`ia bërë qejfin kolegut të tij të ri në Schalke 04, Donis Avdijaj.

blick.ch shkruan se moda e gjestit të kryqëzimit të duarve, që prodhon shenjën e shqiponjës ka bërë bujë të madhe sidomos në Evropianin 2016 të futbollit, të mbajtur në Francë, transmeton albinfo.ch. Shqiponjat e bëra nga publiku shqiptar pas lojës së Shqipërisë kundër Francës kanë zënë vend në të gjitha faqet e para të gazetave.

Dhe tash edhe Embolo e ka provuar këtë veprim dhe ka pozuar me duar të kryqëzuara në formë shqiponje në hapjen e sezonit të ri të bundesligës me Schalke04, ku ai ka filluar të luajë këtë sezon. Sigurisht, këtë gjest ai e ka bërë bashkë me bashkëlojtarin e tij në këtë klub, talentin po ashtu të shquar, Donis Avdijaj dhe me dy bashkëlojtarë të tjerë, përcjell albinfo.ch. S`do mend, Avdijaj e zotëron këtë “art” më së miri, nënvizon blick.

Ndërsa Embolo ka arritur ta bëjë më mirë se dy bashkëlojtarët tjerë dhe duket se argëtohet mirë me këtë veprim. “Duket sikur të kishte marrë leksione plotësuese nga miku i tij i ngushtë nga FC Baseli, Taulant Xhaka”, ironizon gazeta.