Super liga e Zvicrës në futboll, java e 30

Për FC Basel, Granit Xhaka u fut në lojë nga minuta e 54, Taulant Xhaka dhe Beg Ferati nuk u aktivizuan, e Shaqiri ende vazhdon i lënduar

Në fitoren e FC Lucernit ndaj FC Bellinzones 3:2 për klubin vendës u paraqit gjatë tërë ndeshjes Burim Kukeli. Ky ishte edhe i vetmi futbollist shqiptar në këtë ndeshje.

Reprezentuesi i Kosovës, Kristian Nushi u aktivizua në lojë nga minuta e 70 por nuk arriti ta evitonte humbjen e klubit të tij FC ST. Gallen si vendës ndaj FC Sionit me rezultat minimal 0:1

Lideri i ligës, FC Baseli i cili u takua me të tretin në renditje FC Young Boys shënoi fitore të vlefshme 2 :1 dhe me këtë fitore ruajti ende pozitën e parë.

Në këtë ndeshje të cilën e përcollën mbi 31500 shikues, për klubin vendës tre futbollistët shqiptarë ishin rezervë dhe vetëm Granit Xhaka u fut në lojë nga minuta e 54, kurse Taulant Xhaka dhe Beg Ferati nuk u aktivizuan. Xherdan Shaqiri ende është i lënduar dhe nuk u ftua fare.

Në ndeshjen FC Thun -FC Grasshopper 0 : 1 për ekipin e Thunit tërë ndeshjen u paraqit Muhamed Demiri e Milaim Rama u aktivizua nga minuta e 58.  Në fitoren e mysafirëve ndihmesë të madhe dha Amir Abrashi, e në bankën e rezervistëve (të cilët nuk luajtën fare) në radhët e ekipit mysafir ishin edhe Vullnet Basha dhe Endogan Adili.

Ndeshja në mes FC Zurich dhe FC Neuchatelit do të zhvillohet të enjten me 28 prill.

Kjo ndeshje është shtyrë nga shkaku se pikërisht këto dy skuadra u takuan të hënën me 25 prill në kuadër të gjysmëfinales së Kupës së Zvicrës ku fitore shënoi FC Neuchateli, pas ekzekutimit të penaltive 7 me 6.  Rezultati pas 90 minutave dhe pas lojës shtesë kishte qenë 1 me 1.

Në radhët e FC Zurichut, Admir Mehmedi luajti deri në minutën e 62 kurse nga minuta e 75 u aktivizua edhe Adrian Nikçi i cili edhe arriti të shënonte gjatë ekzekutimit të penaltive. Në finalen e cila do të zhvillohet me 29 maj në Bazel,  FC Neuchatel do të takohet me fituesin e gjysmëfinales tjetër FC Sion -FC Bienne të cilët takohen te enjten me 28 prill.