Rexhepi nuk tërhiqet nga fjalët e dhëna për EULEX-in

Rexhepi ka realizuar një bisedë sqaruese me zëvendësshefin e EULEX-it, Andy Sparkes, me kërkesë të këtij të fundit

Ministri i Punëve të Brendshme i Kosovës, Bajram Rexhepi nuk ka tërhequr fjalët e tij lidhur me funksionimin e EULEX-it në pjesën veriore të vendit. Madje, ai ka thënë se nuk i bie pishman pse ka deklaruar se nuk ka hair nga EULEX-i.

Pas deklarate, Rexhepi kishte realizuar një bisedë sqaruese me zëvendësshefin e EULEX-it, Andy Sparkes, me kërkesë të këtij të fundit, por ai ka mbetur në fjalën e mëparshme.

“Nuk heq as pikë, as presje nga ajo që kam thënë”, ka thënë Rexhepi për mediat, të enjten.

Deklaratat e Rexhepit nxiti reagimin e Sparkesit, i cili nuk është pajtuar me fjalët e ministrit.

Ndërkohë, sipas Klan Kosova, tre zyrtarë të EULEX-it janë duke u hetuar nga vetë misioni evropian i sundimit të ligjit në Kosovës për keqtrajtim të nëpunësve shqiptarë. Sipas dëshmive të këtij televizioni, tre pjesëtarët e EULEX-it kanë keqtrajtuar sistematikisht shqiptarët që punojnë në këtë mision në bazë fetare dhe etnike.

Një nëpunësi shqiptar nuk i është lejuar të shkojë në tualet për të urinuar dhe është detyruar të urinojë në shishe. Ndërsa një nëpunësi shqiptar i është thyer krahu nga një pjesëtar i EULEX-it. Madje, siç raportoi Klan Kosova, mësohet se Stefan Leon, i njohur me nofkën Leo, i cili tashmë është suspenduar nga puna, u ka ndarë shuplaka shqiptarëve.

Lidhur me këto raste zëvendësshefi i EULEX-it, Andy Sparkes ka thënë se fajin e ka dikush në këtë mision që ka njoftuar mediat, ngase dikush, sipas tij, po do që të krijohet imazh i keq për këtë mision.