Maurer: Nga Zvicra po rekrutohen terroristë

Maurer po ashtu ka kritikuar SHBA-në dhe presidentin Obama për "shndërrimin e Bin Ladenit në martir"

Ministri zviceran i mbrojtjes, Ueli Maurer ka tërhequr vërejtjen se rekrutimi i luftëtarëve islamikë në Zvicër po vjen duke u shtuar. Ai ka thënë se madje, vitin e kaluar, për herë të parë në Zvicër është krijuar edhe një rrjet i tyre.

Mauer, në një intervistë që i ka dhënë gazetës “Sonntagszeitung” ka shtuar se “mbetet sekret numri i xhihadistëve nga Zvicra që rekrutohen në kampe stërvitjeje por ne dimë nga njerëzit tanë se ata po stërviten për terroristë”. Më tutje ai ka thënë, se, për ndryshim nga vendet tjera, Zvicra ka mundësi të vogla vëzhgimi dhe një rregullim relativisht të komplikuar ligjore.

Dëshirë e tij do të ishte që në kuadër të ligjit të viheshin edhe paragrafe për terrorin.

Ai ka shtuar se as Zvicra nuk është e sigurt nga sulmet e mundshme terroriste.

Maurer po ashtu ka kritikuar SHBA-në dhe presidentin Obama për fushatën në lidhje me vrasjen e Bin Ladenit. “Përmes vrasjes së tij, që mund të ndihmojë Obamën në fushatën për tu rizgjedhur president, ai ka shndërruar Bin Ladenin në një martir për qarqet ekstremiste islame”. Këto të fundit do të aktivizohen më shumë për hakmarrje, ka shprehur frikën Maurer.