Ish-lojtari i Bajernit mund të braktisë Austrinë për Kosovën

Përfaqësuesja e Austrisë është në panik. Që nga pranimi i Kosovës në UEFA dhe FIFA, futbollistët kosovarë janë duke e braktisur Austrinë për të luajtur për përfaqësuesen e Kosovës. Pas Sinan Bytyqit, i cili tashmë i është bashkuar skuadrës së Kosovës, hapave të tij është duke ndjekur edhe lojtari i ekipit U21 të Austrisë, Ylli Sallahi, njofton albinfo.ch.

Mbrojtësi i krahut ka qenë pjesë e Akademisë së Bajern Munihut për katër sezone, ndërsa nga viti 2015 luan në Bundesligën 2, te Karlsruhen.

Mediat austriake shkruajnë se lojtari nga Skenderaj është cilësuar si një nga lojtarët më me perspektivë për të ardhmen e kombëtares të Austrisë, ndërsa tashmë ai është në kontakt me FFK-në.

“E kam thënë se ne jemi të interesuar. Ai është një lojtar me cilësi të shumta”, ka thënë trajneri i Kosovës, Albert Bunjaki, shkruan krone.at.

Për Sallahin ishte e interesuar edhe kombëtarja shqiptare, i cili e kishte refuzuar për të luajtur për Austrinë, por duket se krejt ndryshe do të jetë tashmë kur bëhet fjalë për Kosovën.

Megjithatë, pritet që vendimi për të ardhmen e Sallahit të merret vetëm pas muajit tetor, kur përfaqësuesja austriake U-21, pjesë e të cilës ai është aktualisht, të luajë ndeshjet e kualifikueseve të Evropianit ndaj Ishujve Farone dhe Gjermanisë.