Shqiptarët ‘pushojnë’ në Kupën e Zvicrës

Katër futbollistët e kombëtares shqiptare që aktivizohen me klubet zvicerane nuk janë përdorur nga trajnerët e tyre përkatës duke u lënë pushim

Këtë fundjavë në Zvicër nuk janë luajtur ndeshje të vlefshme për kampionat pasi ato i kanë lënë vend ndeshjeve të Kupës. Katër futbollistët e kombëtares shqiptare që aktivizohen me klubet zvicerane nuk janë përdorur nga trajnerët e tyre përkatës duke u lënë pushim, shkruan albinfo.ch.

Luzern-i fitoi me rezultat 0:3 në transfertë përballë Ticinos duke u kualifikuar për në raundin e ardhshëm. Jahmir Hyka nuk ishte grumbulluar në këtë takim pasi sipas klubit zviceran ka qenë i sëmurë.

Baseli u kualifikua gjithashtu duke fituar në transfertë 0:1 ndaj Zugut. Xhaka ishte lënë pushim nga trajneri i ekipit bashkë me disa titullarë të tjerë që u aktivizuan në mesjavë në takimin e Ligës së Kampionëve përballë Ludogoretsit.

Edhe Zurichu i Armando Sadikut dhe Buerim Kukelit u kualifikua duke fituar si mysafir ndaj Belizonës me shifrat 0:2, por dy futbollistët shqiptarë u lanë pushim pas aktivizimit në mesjavë në Ligën e Evropës përballë Villarrealit.

Ekipet e Zvicrës gjithmonë kanë pasur futbollistë shqiptarë, ku shumë prej tyre janë kyç në skuadrat e tyre.