Pjesëtarët e FSK-së nuk do të vihen në misione policore

FSK-ja do të bashkëpunojnë me policinë, por nuk do ta ndihmojnë për të arrestuar njerëz apo për të kontrolluar turma, siç parashihte një draft i memorandumit të bashkëpunimit që ishte paraparë të nënshkruhej midis Ministrisë së Forcës së Sigurisë dhe Ministrisë së Punëve të Brendshme.

Ministër i Punëve të Brendshme, Bajram Rexhepi, ka thënë për mediat e vendit se memorandumi do të firmoset nga ai dhe kolegu i tij, Agim Çeku, por pas ndërrimit të përmbajtjes së këtij drafti.

Drafti i memorandumit, përmbajtja e të cilit pas publikimit në media nxiti reagime në publik, parashihte që FSK-ja të mund të angazhohej edhe në arrestimin e delikuentëve dhe mbajtjen e tyre, derisa t’i dorëzohen policisë.

Gjithashtu parashihet menaxhimin e situatave që dalin jashtë kontrollit, apo edhe për kontrollimin e turmave në rrugë dhe në tubime.