97 kompani ndërtimi mbeten pa licenca

Për shkak se nuk kishin inxhinierë të kualifikuar dhe shumë prej tyre punonin me dokumente të falsifikuara

Ministria e Tregtisë e Kosovës ua ka marrë licencat 97 kompanive të ndërtimit, për shkak se nuk kishin inxhinierë të kualifikuar dhe shumë prej tyre punonin me dokumente të falsifikuara. Para dy muajve kjo ministri kishte pezulluar licencat edhe të mbi 100 kompanive për të njëjtat arsye.Shumica e kompanive ndërtimore në Kosovë kanë vepruar me dokumente të falsifikuara, shkruan gazeta “Express” . Tash, të gjitha këto kompani janë në shënjestër të Ministrisë së Tregtisë dhe Industrisë. Kjo ministri para dy muajve ua mori licencat mbi 100 kompanive ndërtimore, të cilat deri atëherë kishin operuar me dokumente të falsifikuara dhe nuk kishin pasur inxhinierë të kualifikuar.Në njërën anë ministria po mundohet të bëjë rregull në këtë veprimtari biznesi dhe në anën tjetër Banka Botërore në raportet e saj e cilëson si vend të keq për ndërtimtari pikërisht në saje të vështirësive për t`u pajisur me licenca.Zyrtarë të Ministrisë së Tregtisë dhe e Industrisë, kanë thënë se kjo po bëhet për krijimin e kritereve më të ashpra për kompanitë që destinim e kanë ndërtimin.