12 milionë franga në emër të ndihmave për kthim

Shuma e përmendur është dukshëm më e vogël se shpenzimet që bën shteti për riatdhesimin e dhunshëm të refugjatëve

Gjithnjë më shumë refugjatë, të cilëve Zvicra nuk ua ka njohur statusin, po përfitojnë nga ndihma për kthim në vendet e prejardhjes. Ata azilkërkues që e braktisin Zvicrën në mënyrë vuillnetare marrin një shumë parash nga autoritetet e këtushme.

Marrë në tërësi janë 12 milionë franga që shteti ua ndan brenda vitit të kthyerve si stimulim për t`u integruar sërish në jetën e vendit të prejardhjes, ka thënë zëvendësja e drejtorit të Zyrës Federale për Migracion Elisabeth Gugger. Ata marrin shuma të ndryshme, varësisht nga projekti që kanë paraqitur, me të cilin do të fillojnë ndonjë punë në vendin e tyre, shkruan tagesschau.ch.

“Kur përmenden 12 milionë, duket sikur bëhet fjalë për para të madhe”, thotë Gugger, por, sqaron ajo, shuma e përmendur është dukshëm më e vogël se shpenzimet që bën shteti për riatdhesimin e dhunshëm të refugjatëve tjerë.

Megjithatë, këto ndihma janë të kontestuara nga segmente të ndryshme të politikës zvicerane. Kështu, FDP (Partia Liberale) ka kërkuar gjatë javës së kaluar ndërprerjen e ndihmave të kthimit në shuma të larta parash, duke e quajtur këtë “stimulim për ardhjen e refugjatëve të tjerë”. Ndërkaq autoritetet e fushës së migracionit këmbëngulin se efikasiteti i këtyre ndihmave tashmë është dëshmuar në praktikë.