Më shumë se gjysma e fëmijëve në Zvicër kanë prindër jozviceranë

Ndërsa në Zvicër sot jetojnë 2.5 milionë njerëz mbi 15 vjeçarë që kanë prejardhje të huaj, që shprehur në përqindje është plot 36%

Çdo i dyti fëmijë në Zvicër ka prindër jozviceranë ndërsa çdo i treti banor në përgjithësi ka prejardhje të huaj. Thënë ndryshe: në Zvicër sot jetojnë 2.5 milionë njerëz mbi 15 vjeçarë që kanë prejardhje të huaj, që shprehur në përqindje është plot 36%.

Te fëmijët e vegjël, nën moshën 6 vjeçare përqindja e atyre që kanë rrënjë të huaja tashmë është 54 për qind, tregon raporti më i ri për migracion dhe integrim, të publikuar nga Zyra Federale për Statistikë, shkruan 20minuten.ch.

Sipas këtij raporti, edhe në moshat 31 deri 40 vjeçare, banorët me prejardhje të huaj janë afër gjysmës, respektivisht ata përbëjnë tashmë 49% në kategorinë e tyre të moshës, transmeton albinfo.ch. Ndërsa nga viti 2003 deri në vitin 2015 shkalla e pranisë së të rinjve mbi 15 vjeçarë që nuk kanë prejardhje të huaj ka rënë nga 70 në 63 për qind.

“Këta njerëz janë pjesë e Zvicrës. Ata janë pasurim për shoqërinë tonë – nga ana kulturore dhe ekonomike”, thotë lidhur me këtë deputetja nacionale nga SP, Silvia Schenker. Sipas saj, Zvicra ka qenë prej kohës shumëngjyrëshe. Por për të garantuar një bashkëjetesë të mirë është i domosdoshëm integrimi i suksesshëm, përcjell albinfo.ch. Në këtë pikë, “gjatë 20 viteve të fundit janë nxjerrë mësime të mira”, ka thënë ajo. Kështu, sot i japim më shumë rëndësi mësimit të gjuhëve të vendit nga fëmijët me prejardhje të huaj, para fillimit të shkollës.

Por, nuk mendon kështu politikani i SVP-së, deputeti nacional Marko Tuena, transmeton albinfo.ch. “Migrimi në rritje sjell më shumë kriminalitet, sistemi social ngarkohet më shumë dhe mësuesit në shkolla janë më të ngarkuar , pasi që fëmijët nuk e njohin sa duhet gjermanishten.