Vajzat myslimane merren fare pak me sport

Sipas studimit, angazhimi sportiv te vajzat myslimane ka shënuar rënie ndërkohë që te djemtë është parë një rritje relative

Sipas një studimi të bërë nga universiteti ETH i Cyrihut, vajzat nga familjet myslimane merren shumë më pak me sport se moshataret e tyre zvicerane ose edhe ato të besimeve tjera. 

Dallimet janë më të mëdha se sa është menduar, thonë autorët e studimit.

Studimi është bërë me 600 nxënës të shkollave fillore të Winterthurit. Dhe përfundimi ka qenë se dallimet nuk kanë të bëjnë vetëm me përkatësinë fetare dhe gjinore . Edhe djemtë dhe vajzat nga vendet e Evropës Juglindore merren mesatarisht më pak me sport krahasuar me moshatarët dhe moshataret e tyre zvicerane. Rrjedhimisht ata dhe ato janë më pak të lëvizshëm e të shkathtë fizikisht se sa djemtë dhe vajzat zvicerane.

Studimi ka ndjekur aktivitetet sportive të 600 fëmijëve nga klasa e parë deri në klasën e katërt.

Sipas rezultateve të këtij studimi, angazhimi sportiv te vajzat myslimane ka shënuar rënie ndërkohë që te djemtë është parë një rritje relative.

Udhëheqësit e studimit kanë konstatuar se rëndësi për angazhimin e fëmijëve në sporte ka statusi social i familjeve. Kështu, më aktivë në sport janë fëmijët e familjeve të shkolluara ose të pasura, në krahasim me ata të familjeve me status më të ulët social.