Pacolli takohet me Mogherinin, ia përmend vizat

“Liberalizimi i vizave është hapi vendimtar, që duhet kryer tani sepse ndikon fuqishëm në perspektivën e të rinjve kosovarë", deklaroi Pacolli

Zëvendëskryeministri dhe ministri i jashtëm i Kosovës, Behgjet Pacolli, është takuar me përfaqësuesen e lartë të Bashkimit Evropian, Federica Mogherini.

Pacolli ka kërkuar nga Mogherini që ta shpejtojë procedurën e liberalizimit të vizave sepse ndikon në perspektivën e të rinjve kosovarë, përcjell albinfo.ch.

“Liberalizimi i vizave është hapi vendimtar, që duhet kryer tani sepse ndikon fuqishëm në perspektivën e të rinjve kosovarë, që janë të edukuar mirë, me mendje të hapur dhe për një Kosovë me frymë të re evropiane”, është shprehur Pacolli.

Ndërkohë, Mogherini, i ka premtuar Pacollit se viti i dytë i mandatit të këtij Komisioni do të jetë vendimtar për integrimin evropian të rajonit, të Kosovës dhe pse jo për çështjen e liberalizimit të vizave në veçanti.

Gjatë qëndrimit në Bruksel, Pacolli ka takuar edhe përfaqësuesit e tjerë të lartë të BE-së nga Parlamenti Evropian, Komisioni si dhe ishte pritur në selinë qendrore të NATO-s nga zëvendëssekretarja e përgjithshme e NATO-s, Rose Gottemoeller.