Aksidentohet futbollisti i njohur, thyen brinjët

Sergio Aguero mësohet se ka pësuar një frakturë në brinjë dhe do të mungojë dy muaj

Futbollisti i njohur argjentinas, Sergio Aguero, ka pësuar një aksident me veturë në Amsterdam të Holandës. Ai më pas është shtruar në spital.

Futbollisti i Manchester City-t po shkonte në aeroport me taksi pas një koncerti të këngëtarit kolumbian Maluma, përcjell albinfo.ch.

Shoferi i taksisë humbi kontrollin e mjetit dhe u përplas me një shtyllë. Sipas mediave argjentinase, ishte rripi i sigurimit ai që i shpëtoi jetën futbollistit të njohur.

Aguero mësohet se ka pësuar një frakturë në brinjë dhe do të mungojë dy muaj, përfshi dy ndeshjet e rëndësishme që Argjentina do të luajë kundër Ekuadorit dhe Perusë, të vlefshme për eliminatoret e Botërorit “Rusi 2018”.

Edhe klubi anglez, Manchester City ka konfirmuar se argjentinasi do të mungojë deri në dy muaj.

Ditë më parë i ishte lënduar edhe futbollisti tjetër, Mendy, i cili pritet të jetë larg fushës deri në nëntë muaj.