U kërkon ndjesë prindërve të vajzës që ka vrarë

Sabit L., prindërve të Céline Franck: "Po përpiqem të ju shikoj në sy. Më vjen keq që ju kam shkaktuar kaq shumë dhembje..."

Sot, në Gjykatën e Qarkut në Uster, kanë bërë deponimet e tyre të dyta, prokuroria, përfaqësuesi i palës së dëmtuar dhe mbrojtja. I fundit e ka marrë fjalën i akuzuari për vrasje, i cili për herë të parë u ka kërkuar ndjesë prindërve të viktimës.

Dorasi, shqiptar 23 vjeçar nga Kosova, i rritur në rrethinën e Cyrihut, në muajin mars të vitit 2009 kishte vrarë të dashurën e tij, 16 vjeçaren Céline Franck me armë zjarri. Ditën e tretë dhe të fundit të gjykimit, ai, duke u ballafaquar në mënyrë të drejtpërdrejtë me prindërit e viktimës, u ka kërkuar ndjesë atyre, përshkruan nzz.ch. momentin emocional që u pa në sallën e gjyqit.

“Po përpiqem të ju shikoj në sy. Unë nuk desha ta bëj këtë. Më vjen keq që ju kam shkaktuar kaq shumë dhembje. Në çdo ditë të mallkuar pendohem për atë që kam bërë”.

Prokuroria, mbrojtja dhe përfaqësuesi i palës së dëmtuar, në pledoajetë e tyre nuk ofruan të dhëna të reja dhe mbeten pranë qëndrimeve tashmë të deklaruara. Padia kërkon 20 vjet burg për vrasje të rëndë, mbrojtja, 39 muaj burg për vrasje nga pakujdesia.

Dita kur do të shpallet vendimi i gjyqit ende nuk është përfundimtare. Mbetet të sqarohet nëse do të jetë nesër (e premte në orën 15) ose të shtunën, në orën 9, në varësi nga kohëzgjatja e këshillimeve.