Fëmijët kishin probleme me frymëmarrje, policia evakuon shkollën afër Cyrihut

Policia ka njoftuar se ende nuk është gjetur shkaku pse fëmijët kishin probleme me frymëmarrje

Shkolla Lindenbuel në Volketswil u evakuua të hënën më 2 tetor nga policia zvicerane, sepse mësuesit kanë raportuar se disa fëmijë kishin probleme të frymëmarrjes, shkruan ‘thelocal.ch’.

Të paktën 35 fëmijë janë kontrolluar nga ekipet mjekësore, pasi policia ka evakuuar më shumë se 500 nxënës e staf të shkollës, disa kilometra në lindje të Cyrihut, përcjell albinfo.ch.

Policia ishte njoftuar se në orën 10:30 në shkollë, një substancë e panjohur kishte shkaktuar probleme të frymëmarrjes në disa fëmijë.

Pasi ishin evakuuar, specialistë kimikë të ushtrisë kishin kontrolluar ndërtesën. “Deri në këtë pikë, asnjë substancë e dëmshme nuk është zbuluar”, ka njoftuar policia e Cyrihut.

Fëmijët të cilët ishin kontrolluar ishin liruar më parë, derisa shkolla është rihapur tri orë më pas. Shkaku i problemeve të frymëmarrjes mbetet ende e panjohur, ka njoftuar policia.