Pak shanse për “6 javë pushim”

63 për qind e të anketuarve janë kundër kësaj iniciative ndërsa vetëm 33% pro

Iniciativa popullore “6 javë pushim për të gjithë” për të cilën do të votohet më 11 mars pritet ta ketë shumë të vështirë të fitojë shumicën.

Në krahasim me matjen e opinionit të para një muaji është rritur shumë përqindja e kundërshtarëve të kësaj iniciative, ka thënë drejtuesi i institutit për hulumtimin e opinionit publik gfs-Bern, Claude Longchamp.

63 për qind e të anketuarve janë kundër kësaj iniciative ndërsa vetëm 33% pro, ndërsa vetëm 4% nuk kanë ende mendim të qartë. Është interesante se brenda një muaji është shtuar për 8 për qind numri i atyre që i kanë thënë jo kësaj iniciative.

Një shumicë kjo iniciativë e ka të siguruar vetëm në kampin e majtë, gjegjësisht te votuesit e SP-PS-së dhe te të Gjelbrit, me 60% gjegjësisht 66%. Ndërsa te partitë e djathta është trend i kundërt. Kështu, te FDP-PLR për 6 javë pushum janë vetëm 16%, te SVP-UDC 21% dhe te CVP 26%.

Në anketë është marrë mendimi i 1400 personave me të drejtë vote në gjithë Zvicrën.