Tre shqiptarë, kandidatë për Parlamentin e Thurgaut

Për Parlamentin e Kantonit Thurgau kandidojnë: Alban Imeri dhe Besim Kauz për BDP-në ndërsa Arian Bilali për SP-PS

Sot në kantonin Thurgau po zhvillohen votimet për Parlamentin e Kantonit. Për 130 vendet e parlamentit përmes 49 listave kandidojnë 914 veta gjegjësisht 638 meshkuj dhe 238 femra. Risi në zgjedhjet e sivjteme është se ato bëhen në nëntë qarqe në vend se tetë sa kanë qenë deri më tash.

Në zgjedhjet për deputet në Parlamentin e këtij kantoni bëjnë gara edhe tre shqiptarë. Për Partinë BDP kandidojnë dy veta:  Alban Imeri nga Kumanova, student i matematikës në Universitetin ETH të Cyrihut, dhe Besim Kauz, 44 vjeçar nga Tetova. Ndërsa për SP-PS kandidon nxënësi 17 vjeçar Arian Bilali, me prejardhje nga Gostivari.

E veçanta e kandidatëve shqiptarë është se dy nga tre kandidatët i takojnë një partie të re, BDP-së, e cila ka dalë nga ndarja me SVP-UDC-në. Ndërkaq kandidatët e deritashëm për parlamentet e ndryshme kantonale në Zvicër (dhe tre fituesit e vetëm të deritashëm) janë të partisë SP-PS.

SVP-UDC është partia numër një në këtë kanton që i lë shumë mbrapa partitë tjera. Mirëpo mendohet se trendi i kohëve të fundit i rënies së kësaj partie mund të reflektohet edhe në Thurgau. Për më tepër, në aferën rreth kryetarit të Bankës Nacionale të Zvicrës Philipp Hildebrand, rolin e ndërmjetësuesit e ka luajtur deputeti i këtij parlamenti kantonal, Hermann Lei.