Mark Zuckerberg zotohet të “rregullojë” Facebookun

(KEYSTONE/Christian Beutler)

Themeluesi dhe drejtori ekzekutiv i Facebookut, Mark Zuckerberg, është zotuar që të “përmirësojë” kompaninë e tij gjatë vitit 2018.

Në një postim të gjatë në faqen e tij në rrjetin social, Zuckerberg ka thënë se Facebooku ka bërë disa gabime në zbatimin e politikave dhe në parandalimin e keqpërdorimeve.

Zuckerberg është i njohur edhe për sfidat e tij që i cakton çdo vit që prej kur nisi Facebookun më 2009.

Rrjeti social është akuzuar së fundmi ashpër për lejimin e lajmeve të rreme para zgjedhjeve në SHBA dhe në vende të tjera. Facebooku është kritikuar edhe për lejimin e reklamave politike ruse për zgjedhjet e vitit 2016 në SHBA, transmeton Albinfo.ch.

Zuckerberg tani thotë se është i fokusuar në “çështjet e rëndësishme, si mbrojtja e komunitetit nga abuzimi dhe urrejtja, mbrojtja nga ndërhyrja shtetërore, ose sigurimi që koha e kaluar në Facebook të jetë kohë e shpenzuar mirë”.

“Nëse do të jemi të mirë në këtë sivjet, viti 2018 në fund do të ketë trajektore shumë më të mirë”, ka shkruar ai.

Ai ka thënë po ashtu se do të synojë që të shtrijë internetin te të gjithë njerëzit dhe të mos lejojë përqendrimin vetëm te disa kompani të mëdha. Është zotuar se do të merret edhe me hulumtimin e kriptovalutave për të parë se si do të mund t’i shfrytëzojë ato për përmirësimin e Facebookut.