Haradinaj: Bartësit e zhvillimit ekonomik nuk janë vetëm!

“Bartësit e zhvillimit ekonomik nuk janë vetëm. Qeveria do t’i mbështesë të gjithë ata që e  kanë këtë mision”, kjo ishte porosia e kryeministrit Ramush Haradinaj në hapjen e takimit me komunitetin e biznesit dhe Odën Ekonomike të Kosovës.

Bërja bashkë e bizneseve, përmes Odës Ekonomike kishte për qëllim prezantimin e projekteve konkrete që do të paraqiten në samitin e radhës të Bankës Evropiane për Rindërtim dhe Zhvillim e që do të mbahet më 26 shkurt në Londër, përcjell albinfo.ch.

Këshilltari i kryeministrit dhe Koordinatori për Ballkanin Perëndimor, Gazmend Abrashi tha se takimi i sotëm po mbahet në vazhdën e përgatitjes për konferencën e BERZH-it dhe në koordinim me kryetarin e Odës Ekonomike të Kosovës, Safet Gërxhaliu, do të selektohen projekte konkrete, të cilat më pastaj i prezantohen Bankës Evropiane për Rindërtim dhe Zhvillim.

Kryetari i Odës Ekonomike, Safet Gërxhaliu, kërkoi avancimin e dialogut publik-privat i cili do të jetë në funksion të së ardhmes.

Ndër projektet e përmendura kryesonin ato për energjinë alternative derisa u propozua nga bizneset nevoja e krijimit të një organizate të specializuar, e cila do të merrej me përpilimin dhe zhvillimin e projekteve dhe të cilat më vonë do të prezantoheshin në forume ndërkombëtare.