‘7 Days in Entebbe’, premierë në Berlinale

Ngjarja e vërtetë, me ç’rast ishte rrëmbyer një aeroplan izraelit në Athinë dhe u dërgua në Ugandë, tregohet nëpërmes filmit ‘7 Days in Entebbe’ të regjisorit Jose Padilha. Rolet kryesore në këtë film i kishin Rosamund Pike dhe Daniel Bruehl. 

Filmi ‘7 Days in Entebbe’, i cili u dha premierë në Berlinale, përqendrohet në pengje dhe rrëmbyesit e tyre, dy militantë nga Fronti Popullor për Lirimin e Palestinës dhe dy persona nga grupi ultra-majtist i Gjermanisë Perëndimore, përcjell albinfo.ch.

Aeroplani ishte në rrugëtimin nga Tel Avivi në Paris më 27 qershor 1976, kur katër persona pas ndalesës që aeroplani bëri në Athinë, e rrëmbyen atë dhe e dërguan në këtë qytet të Ugandës.

Rosamund Pike, e cila në këtë film flet anglisht me theks gjerman, aktron njërën prej militanteve nga Celula Revolucionare e Gjermanisë Perëndimore. Jacques Lemoine, inxhinier, i cili po ashtu i mbijetoi këtij rrëmbimi, ishte në premierën botërore në Berlinale. ‘7 Days in Entebbe’ është një prej 400 filmave që do të shfaqet në Berlinale, ndonëse nuk garon për Ariun e Artë.