“Infobooker”, një doracak për integrimin

Qendra profesionale e qytetit të Bernës për arsim, çështje sociale dhe sport ka publikuar ditë më parë një katalog ku përfshihen manifestimet e karakterit informues për grupet dhe personat me prejardhje të huaj që organizohen në këtë qytet. Siç njofton kjo qendër përmes një komunikate ky katalog mban titullin “Infobooker” dhe në të 25 qendra të ndryshme shpalosin ofertën e tyre, gjegjësisht ofrojnë informata të dorës së parë nga jeta e përditshme, dedikuar migrantëve.

Bëhet fjalë për informatat e tipit: si ta përcjell më së miri fëmijën gjatë moshës shkollore? Si të ruaj shëndetin? Si funksionon sigurimi për pleqëri ose sistemi tatimor. Pastaj, si funksionon në të vërtetë jeta te zviceranët? Përgjigjet më të sakta për këto dhe pyetje tjera do të japin  profesionistë të temave përkatëse.  

Infobooker hedh një urë në mes të migrantëve dhe personave kompetentë të fushave të ndryshme. Qendra profesionale për integrim e qytetit të Bernës ka përpiluar një katalog me manifestimet që lidhen me 32 tema nga përditshmëria. Manifestimet mund të vizitohen falas ose të abonohen me çmime të volitshme nga grupet e personave me prejardhje të huaj.

Informacioni përbën bazën e integrimit. Vetëm kush është i in formuar orientohet mirë në jetën e përditshme dhe mund të marrë pjesë në jetën e qytetit.Katalogu dhe informatat tjera janë në dispozicion në faqen www.bern.ch/infobook, thuhet në komunikatën për shtyp të qendrës profesionale për integrim të qytetit të Bernës.