Përgatitet festë e madhe më 10 shtator

Kjo ditë konsiderohet më e rëndësishmja që nga shpallja e pavarësisë më 17 shkurt, sepse e bënë Kosovën vend me sovranitet të plotë

Autoritetet në Prishtinë kanë filluar përgatitjet për të shënuar në mënyrë sa më madhështore 10 shtatorin, përfundimin e mbikëqyrjes ndërkombëtare të pavarësisë së Kosovës. Kjo ditë konsiderohet më e rëndësishme që nga shpallja e pavarësisë më 17 shkurt, sepse e bënë Kosovën vend me sovranitet të plotë.

Më 10 shtator, sipas paralajmërimeve, në Kosovë do të jenë të pranishëm përfaqësues të vendeve të ndryshe ndërkombëtare, përfshirë edhe arkitektin e pavarësisë së Kosovës, ish presidentin Martti Ahtisaarit dhe dy bashkëpunëtorët e tij, Frank Wisnerit dhje Wolfgang Ischingerit, pa përjashtuar edhe komisionari për zgjerim të BE-së, Stefan Fyle.

Ndërsa sipas gaztës “Epoka e re” më 11 shtator nëpërmjet video-linkut qytetarëve të Kosovës do t’u drejtohet edhe ish-presidenti i Shteteve të Bashkuara të Amerikës, Bill Clinton.

Po ashtu më 10 dhe 11 shtator do të organizohen tubime shkencore e politike, ku do të flasin përfaqësuesit e institucioneve të Kosovës, diplomatë ndërkombëtarë, ambasadorë që kanë marrë pjesë në Grupin Drejtues Ndërkombëtare si dhe diplomatë e politikanë të vendeve të rajonit.

Zëvendëskryeministri Hajredin Kuçi deklaroi për mediet kosovare se 10 shtatori është dita më e rëndësishme pas pavarësisë, sepse e heq mbikëqyrjen ndërkombëtare dhe e bënë Kosovën vend me sovranitet të plotë.

Zyra Civile Ndërkombëtare, e cila është drejtuar që nga shkurti 2008 nga holandezi Pieter Feith, ka pasur autoritet që të vlerësojë zbatimin në praktikë të planit të Ahtisarit dhe të ndërhyj në raste të caktuara kur ai plan shkelet. Plani i Ahtisarit për pavarësinë e Kosovës, ka parishikuar që Kosova e pavarur të mbikëqyrët nga ICO deri në zbatimin e saj të plotë.

Tre muaj më parë është vlerësuar nga Grupi Drejtues Ndërkombëtar, i cili përbëhej nga shtetet e BE-së që e kanë njohur Kosovën e pavarur, SHBA dhe Turqia, se Kosova në masë të madhe e ka përmbushur planin e Ahtisarit, dhe në shtator duhet të hiqet petku i mbikëqyrjes.