Detaje të reja: Një mijë euro ishin shkas që babai rrahu djalin për vdekje

Sipas Malokut, babai i 14 vjeçarit në fillim i kishte gënjyer zyrtarët policorë se djali i tij ka pësuar aksident ndërsa me të filluar hetimet, djalit i ishin vërejtur shenjat e dhunës në trup, nga të goditurat të cilat i kanë sjellë vdekjen

Një mijë euro ishin shkaku që një prind në fshatin Karaçevë e Poshtme e Kamenicës rrahu djalin e tij për vdekje.

Kryeprokurori i Prokurorisë Themelore të Gjilanit, Jetish Maloku tha për “Kallxo.com” se shkaqet e dhunës së prindit ndaj fëmijës ishin një shumë e parave prej një mijë eurosh të cilat dyshoheshin se janë marrë nga fëmija.

“I pandehuri, babai i fëmijës ka qëndruar disa ditë në një banjë shëruese dhe më pas është kthyer në shtëpi. Kur është kthyer e ka vërejtur se i kanë munguar 1 mijë euro nga 3 mijë sa kishte pasur. Babai ka dyshuar se paratë ia ka marrë fëmija i tij i cili ishte 14 vjeç. Ky ishte shkaku që ka shtyrë babanë të rrahë me shkop druri për vdekje djalin e tij 14 vjeçar”, është shprehur Maloku, përcjell albinfo.ch.

“Rastin në polici e ka lajmëruar një kushëri, ndërsa pas arritjes së policisë në vendin e ngjarjes, djali është marrë është dërguar në urgjencë pa shenja jete”, tha Maloku më tutje.

Sipas Malokut, babai i 14 vjeçarit në fillim i kishte gënjyer zyrtarët policorë se djali i tij ka pësuar aksident ndërsa me të filluar hetimet, djalit i ishin vërejtur shenjat e dhunës në trup, nga të goditurat të cilat i kanë sjellë vdekjen.

“Në fillim prindi ka gënjyer zyrtarët policorë se djali i ti ka pësuar aksident por policia më pas e ka kuptuar që e gjitha ka të bëjë me ushtrim të dhunës ndaj të miturit. Po ashtu i pandehuri ka sulmuar edhe vajzën e tij të vetme e cila është 17 vjeçare”, tha në fund Maloku.