Gazetari zviceran pa kurrfarë gjasash ndaj Orllatit

Në dy aktgjykime të publikuara gjatë të enjtes, Gjykata federale zvicerane sërish e ka refuzuar ankesën e gazetarit zviceran, Fabien Dunand, në çështjen e sipërmarrjes "Orllati"

Gazetari zviceran Fabien Dunand, sërish ka pësuar disfatë nga Gjykata federale zvicerane. Ajo ka refuzuar të urdhërojë konfiskimin e arkivit të kontraktorit “Orllati” dhe gjithashtu ka hedhur poshtë kërkesën sfiduese të prolurorit.

Me dy aktgjykimet e publikuara të enjten, Gjykata federale zvicerane sërish ka hedhur poshtë akuzat e ish-kryeredaktorit të së përditshmes zvicerane “24 Heures”, Fabien Dunand, i cili “Orllatin” e padiste për dëmtim të ambientit jetësor.

Gjykata e ka shpallur të papranueshme kërkesën e tij për sekuestrim të arkivit të Orllatit, pasi konsideron se ish-gazetari mund të kërkojë sekuestrimin e tyre të mëvonshëm nëse ai mund të konstatojë se këto dokumente janë relevante në kontekstin e procedimeve kundër tij për shpifje dhe kërcënime që alarmojnë popullsinë. Nga ana tjetër, ai nuk e ka argumentuar mjaftueshëm rrezikun e dëmtimit.

Sa i përket sfidës së prokurorit për hetime kundër shpifjes, edhe kjo akuzë është refuzuar, shkruan “20 Minutes”, përcjell Albinfo.ch.

Gjykata është e mendimit se një hetim i tillë do të mund të kishte qenë i njëanshëm.

Fabien Dunand, i cili vetveten e pagëzon si zbulues të skandaleve, e kishte akuzuar “Orllatin” fillimisht në mënyrë anonime, se është duke e dëmtuar dhe ndotur mjedisin jetësor në Bioley-Orjulaz (VD).

Ai gjithashtu e akuzon edhe këshilltaren kantonale zvicerane, përgjegjëse për mbrojtjen e ambientit jetësor, Jacqueline de Quattro, për një konflikt interesi me “Orllatin” dhe do që ajo të heqë dorë nga ky rast.