Zvicër: Krishtlindjet më të ngrohta në histori

Kështu, në natën e festës (më 24 dhjetor) në Reigoldswil të kantonit Baselland është shënuar temperatura prej 20.9 gradësh

 Temperaturat e ajrit gjatë festës së Krishtlindjeve të këtij viti në Zvicër kanë arritur një rekord të ri. Kështu, në natën e festës (më 24 dhjetor) në Reigoldswil të kantonit Baselland është shënuar temperatura  prej 20.9 gradësh. Temperatura më e lartë e matur deri sivjet në një 24 dhjetor ka qenë në Buchs të St.Gallenit, 17.8 gradë. Ajo qe regjistruar më 24 dhjetor të vitit 2009.

Shkaku i temperaturave tepër të ngrohta për këtë kohë, sidomos në veri të vendit, sipas meteorologëve qëndron në erën e ngrohtë që ka fryrë në Zvicër deri në natën e Krishtlindjes.

Ndërkaq, në ditën e festës, më 25 dhjetor moti në jug të vendit ka qenë i trazuar, me temperaaturën maksimale prej pesë gradësh. Ndërsa temperatura më e ulët në atë ditë është regjistruar në malin Jungfraujoch, minus 15. Pas një nate me shi, të 25 dhjetorit, dita në vijim ka qenë kryesisht pa të reshura.