Shtyhet procesi kundër Varones

Me këtë vendim është mundësuar që procesi të zhvillohet vetëm pasi të kenë përfunduar zgjedhjet për qeverinë e Valisit

Procesi në Antalia të Turqisë kundër komandantit të Policisë së Kantonit Valis, Christian Varone është shtyrë për në muajin mars. Kështu, Varone, që aktualisht është kandidat për qeverinë e kantonit, mund tu kushtohet në tërësi aktiviteteve zgjedhore.

Avokatja e tij turke kishte kërkuar nga trupi gjykues që procesi të shtyhej për 18 mars, ndërsa prokurori ishte për atë që gjykimi të bëhej menjëherë. Në fund, trupi gjykues vendosi që ta shtynte procesin kundër Varones për 19 mars.  

Me këtë vendim është mundësuar që procesi të zhvillohet vetëm pasi të kenë përfunduar zgjedhjet për qeverinë e Valisit. Rundi i parë i zgjedhjeve zhvillohet më 3 mars ndërsa i dyti, më 17 mars.

Kryepolici i Valisit ngarkohet nga drejtësia turke për vjedhjen e një guri të gdhendur, pjesë e një lokaliteti antik në afërsi të qytetit turistik turk, Antalia. Ai ishte kapur në aeroport dhe ishte mbajtur në arrest me dyshimin se po përpiqej ta kontrabandonte gurin antik në Zvicër.

Me ligjin turk një vepër e tillë konsiderohet e rëndë dhe për të parashihen dënime me disa vite burg.