Emision special per Kosovën në Phoenix TV

Në ciklin e emisioneve "Thema" të transmetuesit Phoneix, veç të tjerëve flasin kryeministri i Kosovës, Hashim Thaçi dhe komandanti i KFOR-it, Volker Halbauer

Me rastin e përvjetorit të pestë të shpalljes së pavarësisë së Kosovës, transmetuesi televiziv gjerman Phoenix emeton të shtunën, më 16 shkurt një emision special kushtuar Kosovës. Emisioni në kuadër të ciklit “Thema” fillon në orën 13.00 dhe zgjat 75 minuta.

“Një vështrim në vendin e shkatërruar nga brenda dhe njëherësh jashtëzakonisht fascinues  në zemër të Ballkanit”, prezantohet ky kontribut i mediumit gjerman për Kosovën.

“Me 5 vjet jete Kosova është shteti më i ri i Evropës por edhe vatra më e madhe e krizës në këtë kontinent. Para pak kohësh në Kosovë është luftuar ashpër, dhjetëra mijë njerëz kanë vdekur. Armët ndërkohë kanë pushuar por lufta në kokat e njerëzve vazhdon tutje. Në këtë emision kryeministri i Republikës së Kosovës Hashim Thaçi jep një pasqyrë për të ardhmen e vendit, pikërisht në aspektin e bashkëjetesës në mes të shqiptarëve dhe serbëve.

Emisioni i jep fjalën edhe komandantit të KFOR-it, gjeneralit gjerman Volker Halbauer i cili flet për vështirësitë e sigurimit të paqes në vend.

“Njësoj, si në Mitrovicë, në qytetin e fundit të ndarë të Evropës me konfliktetet ende përshkallëzuese, si në Has, ku traditat e Kosovës vazhdojnë jetën e tyre; Njësoj si në Prishtinë, në qendër të Kosovës ose në manastiret si qendra të kulturës serbe, tema “Pesë vjet Kosovë” ofron  pamje shumëplanëshe në politikën, jetën dhe kulturën e shtetit më të ri të Evropës”, shkruan në prezantimin e emisionit.

Emisionin do ta pasurojnë edhe filmi dokumentar “Jugoslawien: Beinache wie vor dem Krieg…” (ZDF/Arte) dhe përmbajtje tjera të transmetuesit Phoenix.