Mjekët: 60 orë punë në javë, 12 ditë pa ndërprerë!

Mjekët kërkojnë nga politika, autoritetet dhe përgjegjësit e spitaleve të kujdesen që ligji i punës të respektohet në të gjitha spitalet e Zvicrës

Për shumë mjekë dhe kryemjekë në Zvicër, java e punës 60 orëshe ashtu si dhe 12 ditë punë e pandërprerë është përditshmëri. Kjo ka bërë që shoqata e mjekëve të iniciojë një fushatë për të sensibilizuar shoqërinë me rrezikun që një punë e tillë mund t`u shkaktojë pacientëve dhe për të tërhequr vëmendjen se kjo punë përbën shkelje të ligjit të punës.

Slogani i fushatës në nivel nacional të bashkësisë së mjekëve të asistencës dhe kryemjekëve të Zvicër është “spital.illegal. normal?”. Fushata ka filluar të martën në Bernë dhe vazhdon tri javë.

Në forma të ndryshme, veç tjerash edhe me stripin “tatort spital” (vendi i krimit, spitali) mjekët duan të bëjnë të njohura kushtet antiligjore të punës që bëjnë ata.

Duke filluar nga viti 2005, mjekët asistentë janë nën mbrojtjen e ligjit të punës. Mirëpo, tetë vite më pas, bilanci është dëshpërues: 12 ditë pune radhazi dhe mbi 60 orë pune në javë për shumë prej tyre janë përditshmëri.

Bashkësia kërkon nga politika, autoritetet dhe përgjegjësit e spitaleve të kujdesen që ligji i punës të respektohet në të gjitha spitalet e Zvicrës.

Fushata ka filluar me një “aksion gueril”. Në vende të dukshme si në automatet e biletave të autobusit etj. janë shfaqur fjali të shkruara si: “shoferi juaj i autobusit po punon prej 12 ditësh pa u ndalur”. Ky krahasim do të aludoje në punën e vështirë dhe të gjatë që në fakt bëjnë mjekët dhe në pasojat që mund ë ketë kjo për pacientët.