Kërcënon me armë “shëruesi nga Berna”

Me një thikë dhe dy shpata samurajësh, është barrikaduar në banesën e tij, i akuzuari për infektim të qëllimtë me HIV, i njohur si “shëruesi i Bernës"

Me një thikë dhe dy shpata samurajësh, nga ora 14 e pasdites së sotme është barrikaduar në banesën e tij në Bernë, i akuzuari për infektim të qëllimtë me HIV, i njohur si “shëruesi nga Berna”.

Policia ka provuar sot dy herë ta arrestojë, njofton një zëdhënës i policisë së Bernës. Pasi është hedhur gaz lotsjellës nga policia, i akuzuari është tërhequr brenda në banesë dhe ka kërcënuar se do të qëllonte me armë.

Ndërkohë përkundër mungesës së “shëruesit”, procesi kundër tij, i cili është duke u zhvilluar në një gjykatë të Bernës, ka vazhduar edhe të enjten pasdite.

Në seancën e paradites, avokati i tij kishte deklaruar se i akuzuari për shkak të “lodhjes akute psikike dhe fizike” nuk ka mundur të paraqitet në gjyq.

Policia ka bërë një rrethim për të siguruar vendin e ngjarjes dhe për parandaluar rrezikun për banorët e shtëpive të afërme.