Dua zgjedh Prishtinën para Londrës

Këngëtarja kosovare me famë, Dua Lipa, në një intervistë për BBC-në ka folur për projektet e saj të reja, jetën në Londër si dhe familjen e vendin ku ka lindur, Kosovën.

Dua vazhdon të shfaqë krenari për prejardhjen e saj, e kjo e bën ambasadore të artit muzikor në botë. Ajo ka treguar se është duke punuar në albumin e saj më të ri, edhe pse tërë kohën është duke performuar anembanë botës. Këngëtarja thotë se shumë shpesh inspirohet nga ngjarje të trishtuara e ndodhi të saj personale. E pyetur për jetën e saj si emigrante në Angli, Dua ka thënë se askush nuk largohet nga vendlindja me vetëdëshirë.

“Askush nuk largohet nga vendlindja e tyre me vetëdëshirë, por prapë jam me fat që kam jetuar në Londër dhe i kam përmbushur ëndrrat e mia. Kjo nuk iu ndodh emigrantëve shpesh”, ka thënë ajo.

Këngëtarja e ka quajtur Prishtinën shtëpi të saj, derisa e ka zgjedhur para Londrës. Dua, po ashtu, ka folur për kuptimin e emrit të saj, që për audiencën ndërkombëtare është e huaj.

“Në gjuhën arabe emri im do të thotë ‘Lutje’, ndërsa në gjuhën time amtare kuptimi i emrit ‘Dua’ qëndron për “Dashurinë”, ka theksuar ajo.

 

---