2715 firma “Në listën e zezë” për dumping

Në gjithë Zvicrën kishte 2715 firma të cilat kanë shkelur ligjin dhe për këtë arsye janë dënuar me të holla ose me bllokim mjetesh. Është ky numër rekord i regjistruar deri më tash

Gjithnjë më shpesh ndodh që inspektorët në sheshe ndërtimi të hasin në punëtorë që punojnë “në të zezë” respektivisht që shkelin ligjin. Ata ose nuk janë të paraqitur në mënyrë të rregullt ose nuk paguajnë  (apo paguajnë jo mjaftueshëm) sigurimet sociale ndërsa punëdhënësit e tyre u bëjnë presion, gjegjësisht dumping për pagat.

Siç tregojnë hulumtimet e bëra nga gazeta “SonntagsBlick” numri i firmave të sanksionuara që gjenden në “listën e zezë” të Seco-s (Sekretariati Shtetëror për Ekonomi) po vjen vazhdimisht duke u rritur.

Kështu, në vitin 2012 në gjithë Zvicrën kishte 2715 firma të cilat kanë shkelur ligjin  dhe për këtë arsye janë dënuar me të holla ose me bllokim mjetesh. Është ky numër rekord i regjistruar deri më tash.

Në një situatë të tillë, sindikata Unia është alarmuar. “Shkeljet e rregullave që përcaktojnë pagat po shtohen sidomos në firmat nënkontraktuese”, thotë  një zëdhënës i kësaj sindikate për gazetën. Sipas tij, në krahasim me një vit më parë, në disa degë të ekonomisë numri i shkeljeve është rritur pothuajse 50 për qind.

Për këtë arsye, thotë ai, “ne në nivel të Zvicrës kemi nevojë për dyfishin e kontrollimeve në krahasim me ato që kemi bërë deri më tash. Po ashtu na nevojiten më shumë resurse për personelin ashtu sikurse edhe për kantonet, për t`i përpunuar rastet”.

Kontrollorët janë në përballje me truqe gjithnjë të reja që përdorin firmat dhe punëtorët e tyre për t`i bishtnuar plotësimit të kushteve të punës dhe të pagave. “Por, edhe kur shqiptohen dënimet, masa ndëshkuese është shpesh shumë e ulët”, thonë në komisionin kontrollues të Lucernit.