Grabiten 45 milionë dollarë në 24 vende të botës

Policia në New York tha se ka kapur 7 persona të një organizate ndërkombëtare kriminale, të cilët kishin grabitur një total prej 45 milionë dollarësh në 24 vende të botës

Policia në New York tha se ka kapur 7 persona të një organizate ndërkombëtare kriminale, të cilët kishin grabitur një total prej 45 milionë dollarësh në 24 vend të botës. Plaçkitësit depërtuan në sistemet kompjuterike të bankave dhe pastaj kishin plaçkitur mijëra bankomate (ATM) në mbarë botën.

Prokuroi i New York tha se bëhet fjalë për një “grabitje masive bankash të stilit të shekullit 21”, që ka një shtrirje në mbarë botën. Në vend të armëve dhe maskave, plaçkitësit kanë përdorur laptopë me internet.

“Autorët kanë përdorur teknika të sofistikuara për të depërtuar në sistemet kompjuterike të firmave financiare globale”, tha Departamenti amerikan i Drejtësisë.
Policia amerikane ka gjetur të dhënat e kredit kartelave, të tilla si pin kodet. Hajnat kishin  depërtuar për herë të parë në sistemin e një ofertuesi indian të kartelave bankare “Visa” dhe “MasterCard”, shkruan “New York Times” (“NYT”).

Sipas “NYT”, janë sulmuar pikërisht ata operatorë që zakonisht kanë standardet më të rrepta të sigurisë.

Të dhënat nga një total prej pesë kartelave bankare janë shpërndarë për kriminelët e tjerë në 20 vende. Ky informacion është i koduar në vija magnetike të kartave. Me këto kartela më 21 dhjetor 2012 janë grabitur 5 milionë dollarë në 4500 ATM në mbarë botën.

“New York Times” ka krahasuar autorët e këtyre vjedhjeve spektakulare si në filmat gangster “Ocean Eleven”. Gjatë arrestimit policia gjeti fotografitë në telefonat e autorëve. Paratë e plaçkitura janë investuar në blerjen e artikujve të ndryshëm luksozë. 20 për qind e parave duhet t’i kenë ende në pronësi autorët e vjedhjeve ndërkombëtare të automatëve të bankave.

Paratë janë marrë nga dy banka me bazë në Emiratet e Bashkuara Arabe dhe Oman.

Vetëm në Nju-Jork janë vjedhur 2.4 milionë dollarë në 2 904 bankomate.