Policia ndalon diplomatin zviceran

Policët qëlluan me pistoleta në drejtim të makinës së diplomatit zvicern të OECD-së për ta ndaluar më në fund atë

Me rastin e një kontrollimi në trafik që po bënte policia e Parisit, asaj i është dashur që të qëllonte me armë për të ndalur makinën e një diplomati zviceran. Fjala është për ambasadorin zviceran të OECD-së në Paris. Siç shkruan gazeta “Le parisien”, vetura e diplomatit të përmendur ishte duke qarkulluar me shpejtësi të tejkaluar nëpër rrugët e Parisit.

Ambasadori i OECD-së ka provuar dy herë që t`i ikë kontrolleve policore, duke rrezikuar me këtë rast të shkelte policët. Kjo ka qenë arsyeja që policët të qëllonin me pistoleta në drejtim të makinës, për ta ndaluar më në fund atë.

Sipas gazetës, përmes kontrollimit të gjakut është ardhur në përfundimin se diplomati kishte alkool në gjak..

Departamenti i Punëve të Jashtme i Zvicrës e ka konfirmuar incidentin.