Politikani zviceran mohon gjenocidin e Srebrenicës

“Flitet vazhdimisht për një gjenocid, por në fakt atje nuk janë masakruar gratë dhe fëmijët por meshkujt, shumica e tyre gjatë veprimeve luftarake.Këtë pastaj e kanë ekzagjeruar”

Oskar Freysinger, deputet nacional nga SVP/UDC, njëherësh ministër i arsimit në kantonin Valis, bëhet edhe njëherë objekt i një skandali. Ai, në një xhirim të shfaqur në emisionin informativ “Schweiz aktuell” të SRF-së e mohon ekzistimin e gjenocidit në rastin e masakrës së Srebrenicës.

Kështu, ai e vë në dyshim një fakt rreth të cilit në historinë aktuale mbretëron qëndrim unik: atë se në Srebrenicë, masakrën ku janë vrarë në një vend 8000 myslimanë të Bosnjës ka ndodhur gjenocidi.

“Flitet vazhdimisht për një gjenocid, por në fakt atje nuk janë masakruar gratë dhe fëmijët por meshkujt, shumica e tyre gjatë veprimeve luftarake.Këtë pastaj e kanë ekzagjeruar”. Këtë përgjigje ai ia ka dhënë një gazetari të lëvizjes “Pax Europa”,  lëvizje kjo kritike ndaj islamizmit.

Ndërkohë “Schweiz aktuell” e përball një ish luftëtare boshnjake (Zuhara Hodzic) nga Srebrencia, me deklarimet e politikanit zviceran. “Si mund të mos jetë gjenocid kur unë e kam parë me sytë e mi?”, thotë ajo, duke e quajtur të turpshme deklaratën e Freysingerit. Të dyja palët kanë bërë krime por Mladiç ka urdhëruar vrasjen e civilëve në mënyrë sistematike.

Për historiografinë, tashmë është çështje e dëshmuar se në masakrën e Srebrenicës bëhet fjalë për gjenocid. Këtë e vërteton për “Schweiz  aktuell” edhe historiania Nada Boskovska, (maqedonase) profesoreshë e historisë së Evropës Lindore në Universitetin e Cyrihut.

“Ajo që ka ndodhur në Srebrenicë është gjenocid i kryer mbi mijëra burra dhe të rinj. Kjo nuk mund të mohohet”, shprehet Boskovska.

Udhëheqësi i Shoqatës së Popujve të Rrezikuar, Christoph Wiedmer, shoqatë që ka një zyrë kontakti në Srebrenicë, e gjykon si skandaloz deklarimin e Freysingerit. “Është e pakuptueshme se si mund të mohohet një gjenocid që është dokumentuar kaq bindshëm. Sidomos nga perspektiva e viktimës”.  

I kontaktuar nga “Schweiz aktuell” për të shpjeguar deklaratën e tij, Freysinger reagon vetëm përmes sms-it , me fjalët: “No comment. Nuk jam historian dhe kam gjëra më të rëndësishme për të bërë”.