Pirgu me “Rigoletton” transmetim live në sheshin e Cyrihut

E veçanta e kësaj shfaqjeje, që është mbiquajtur edhe “Operë për të gjithë”, është se nga salla ku ajo shfaqet, bëhet edhe transmetimi audiovizuel në sheshin “Sechseläuteplatz”

Nesër, më 21 qershor, në kuadrin e manifestimit kulturor të Cyrihut “Festspiele Zürich 2014” në Shtëpinë e Operës shfaqet opera “Rigoletto”, në të cilën tenori shqiptar Saimir Pirgu bart rolin kryesor, atë të Duka di Mantova. E veçanta e kësaj shfaqjeje, që është mbiquajtur edhe “Operë për të gjithë”, është se nga salla ku ajo shfaqet, bëhet edhe transmetimi audiovizuel në sheshin “Sechseläuteplatz” të përuruar pak kohë më parë, që gjendet para godinës së operës.

Me këtë rast, organizatorët e festës së kulturës ftojnë dashamirësit e muzikës klasike që të vijnë ta ndjekin këtë operë, që është njëra ndër kryeveprat e literaturës muzikore botërore. “Opera për të gjithë”, përmes transmetimit nga shtëpia e operës e shndërron sheshin e rregulluar rishtas “Sechseläutenplatz” në një hapësirë të të hapur koncertale.

Adhuruesit e operës dhe kureshtarët janë të ftuar që së bashku me familjarët, të marrin karriget e tyre portative ose batanijet për t`u ulur në shesh, bashkë me shportat e tyre të piknikut ose të shijojnë ushqimet që ofrohen aty pranë, në mënyrë që të përjetojnë një shfaqje operistike nën qiellin e hapur në atmosferën verore të festivalit”, thuhet veç tjerash në ftesën e organizatorit.

Opera “Rigoletto” e vënë në skenë në fillim të vitit të kaluar në Cyrih konsiderohet si njëra ndër shfaqjet më të suksesshme të ke¨saj shtëpie operistike kohëve të fundit.