Mbi 100 mijë kosovarë kërkojnë “drejtësi për gratë e dhunuara”

Peticioni me mbi 100 mijë nënshkrime do t’i dërgohet OKB-së, e cila duhet të shqyrtojë dhe t’i dënojë njerëzit që i kanë shfrytëzuar gratë si instrument të luftës

Më shumë se 100 mijë qytetarë të Kosovës e kanë nënshkruar peticionin: “Kërkojmë Drejtësi Ndërkombëtare për Gratë e Dhunuara gjatë Luftës së fundit”. Nënshkrimet e këtij peticioni, siç u tha në një konferencë për media do t’i drejtohen Organizatës së Kombeve të Bashkuara, me qëllim që të hedh dritë mbi këtë kategori të luftës.

“Janë grumbulluar gjithsejtë 115,759 nënshkrime të qytetarëve, të grave dhe burrave të shtetit tonë, të cilët me këtë rast dhe me këtë dalje masovike dëshmuan sa thellë është plaga e dhunimit të grave, por edhe sa thellë ne e ndjejmë këtë plagë’, deklaroi zëvendëskryeministrja Tahiri.

Ajo tha se qëllimi i këtij bordi ka qenë të mblidhen 100 mijë nënshkrime dhe kjo është realizuar me sukses. “Ju e dini që periudha e mbajtjes së këtij peticioni ka qenë prej 14 deri më 18 korrik, pra 5 ditë pune, ku janë angazhuar ekipet e komunave”, deklaroi mes tjerash Tahiri.

Ajo tha se këtë peticion synojnë t’ia dorëzojnë Sekretarit Gjeneral të OKB-së, Ban Ki Moon, nga i cili d të kërkohet që të bëhet një raport zyrtar për atë se çfarë ka ndodhur në Kosovë gjatë luftës në raport me gratë, dhe në veçanti dhe dhunimin e grave si instrument lufte.

“Ne shpresojmë dhe besojmë se sigurisht do të bëhet një raport zyrtar i cili ka qenë i munguar, sepse ju kam njoftuar edhe më herët, OKB dhe zoti Ban Ki Moon kanë bërë shumë raporte për vende ku kanë ndodhur luftë apo konflikte, por nuk e kanë bërë për Kosovën dhe Kroacinë”, deklaroi Tahiri.

Zëvendëskryeministrja në detyrë u shpreh optimiste se do ta realizohet qëllimi i peticionit, sepse me këtë rast OKB, siç tha Tahiri, do të mbështesë të drejtën ndërkombëtare, e në veçanti humanitare, për mbrojtjen e garave nga shfrytëzimi si instrument të luftës.