Haradinaj: Kush nuk voton, të tjerët votojnë për të!

Kandidati për kryeministër nga radhët e koalicionit AAK – PSD, Ramush Haradinaj, ka mbërritur në shkollën e mjeksisë “Ali Sokoli” dhe  ka votuar në këtë qendër votimi

Ramush Hardinaj bëri thirrje që qytetarët të dalin në votime – pasi në të kundërt të tjerët do të votojnë për ata që nuk dalin.

“Anita edhe unë e shfrytëzuam të drejtën tonë dhe votuam, i lus të gjithë qytetarët pa marrë parasysh bindjet politike, me votë të vendosni vetë – ata që s’votojnë, të tjerët votojnë për të, është sukses për Kosovën një demokraci e tillë. Procesi i votimit po shkon mirë. Jemi në proces të rëndësishëm për vendin”, tha Haradinaj shkurtimisht pas votimit.

Nga ana tjetër, kandidati i Lëvizjes Vetëvendosje, Albin Kurti, thënë se sot është një ditë e veçantë, pasi sipas tij, sovrani do t’ua japë përgjigjet të gjithë politikanëve e partive politike.

“Sot është një ditë fort e veçantë. Të gjitha partive e politikanëve u përgjigjet populli si burim i sovranitet”.

Po ashtu Kurti është shprehur sot të gjithë janë të barabartë, dhe ka bërë thirrje që të gjithë ta shfrytëzojnë të drejtën për të votuar.

“Sot s’ka rendësi a je i pasur a i varfër, a vjen nga fshati a qyteti. A ke mbaruar shkollim të lartë a jo. Të gjithë jemi të barabartë. Të gjithë ta shfrytëzojnë këtë shans historik për nga karakteri. Le të votojmë e le të festojmë”, ka thënë ndër të tjera Kurti.

Gjithashtu edhe kandidati i PDK-së, Kadri Veseli, ka thënë se sot është një ditë e mirë e jashtëzakonshme për Kosovën tonë të shenjtë. I uroj qytetarët, do t’i hapin perspektivën Kosovës, fëmijëve tanë, për hajr na qoftë të gjithëve, përcjell albinfo.ch.