Bazel: Baballarët, të paktën tetë javë pushim nga atësia

Foto Ilustrim

Qyteti i Bazelit dëshiron të prezantojë një pushim të kombinuar prindëror prej 24 javësh, gjë që do t’u mundësonte të dy prindërve të kalojnë më shumë kohë me fëmijët e tyre.

Pushimi aktual i lehonisë në Zvicër është 14 javë. Etërit nuk kanë pushim për të qëndruar me fëmijën e tyre të posalindur, por në shtator Parlamenti mbështeti një propozim për t’u dhënë atyre dy javë leje të paguar të atësisë, shkruan gazeta zvicerane”the local.ch”.

Sipas propozimit të Bazelit, babait do t’i jepet tetë javë, me 16 javët e mbetura të ndara midis dy prindërve. Pushimi prindëror mund të merret gjatë periudhës midis lindjes dhe fillimit të shkollimit të fëmijës.

Mocioni, i cili u prezantua nga Partia Social Demokratike e krahut të majtë, u pranua në nivelin bashkiak. Kantoni tani ka tre muaj për të marrë një qëndrim në lidhje me këtë çështje.

Nëse pranohet, do të ishte hera e parë që baballarët në Zvicër marrin pushim të zgjatur të atësisë, përcjell albinfo.ch.