Takohen sot grupet punuese të LVV-së dhe LDK-së

Marrëveshja për koalicion qeverisës, mblidhen sot këto dy parti

Dy grupet punuese të Lëvizjes Vetëvendosje dhe Lidhjes Demokratike të Kosovës sot do të vazhdojnë me një takim tjetër në përpjekje për arritjen e marrëveshjes për koalicion qeverisës.

Në një intervistë për KosovaPress, kreu i Vetëvendosjes, Albin Kurti, tha se në takimin e grupeve punuese me LDK-në do të diskutohet për çështje ekonomike, teksa bëri të ditur se shumë shpejt pritet të diskutojë me kryetarin e LDK-së, Isa Mustafa.

Kurti, i cili synon postin e kryeministrit, tha se ende nuk i kanë ndarë postet ministrore, pasi sipas tij fokusi fillimisht është te riorganizimi i tyre.

Ndryshe, nga takimi i fundit, dy partitë kanë deklaruar se janë pajtuar që qeveria e tyre të mos ketë më shumë se 12 ministri.

Takimi i parë LDK-VV pas zgjedhjeve ka ndodhur mes dy kandidatëve për kryeministër, Albin Kurtit dhe Vjosa Osmanit, e shoqëruar nga kryetari i LDK-së, Isa Mustafa.

Në zgjedhjet e 6 tetorit, Lëvizja Vetëvendosje doli e para, pasuar nga Lidhja Demokratike e Kosovës

---