Pandemia detyron kompaninë “Lufthansa” të mbyllë 22.000 vende pune

Kompania gjermane ajrore, Lufthansa, ka thënë se planifikon mbylljen e 22.000 vendeve të punës, teksa tenton të përballojë rënien e numrit të fluturimeve për shkak të pandemisë

Lufthansa ka thënë se 22.000 vende punës do të mbyllen në Gjermani, e sipas parashikimeve të kompanisë, pritet që kjo e fundit të veprojë me 100 aeroplanë më pak.

Lufthansa, ashtu si edhe kompanitë e tjera të tilla, është vënë në gjunjë nga kufizimet e vendosura për të frenuar përhapjen e koronavirusit.

“Pa ulje të konsiderueshme të shpenzimeve të personelit gjatë krizës, ne do ta humbim mundësinë për një rikthim më të mirë pas krizës dhe rrezikojmë që Grupi Lufthansa të dalë nga kriza më i dobët”, ka thënë Drejtori për Punë në Lufthansa, Michael Niggemann, përcjell albinfo.ch.

Lufthansa ka nënshkruar marrëveshje muajin e kaluar me qeverinë gjermane në vlerë të 9 miliardë eurove, me qëllim të ikjes nga shkatërrimi.

---