Mbi 330 milionë euro të investimeve të huaja shkuan në patundshmëri

Kjo shumë e lartë e investimeve të huaja në sektorin e patundshmërisë, kryesisht i atribuohet diasporës së Kosovës, e cila investon mjaft mjete financiare në ndërtimin e shtëpive dhe në blerjen e banesave

Mbi 485 milionë euro është vlera e investimeve të huaja direkte në Kosovë, për periudhën janar-nëntor të vitit 2021, sipas të dhënave të Bankës Qendrore të Kosovës, nga e cila nuk ka ende shifra për investimet e huaja gjatë muajit dhjetor 2021.

Dhe, kur shuma prej 485.4 milionë eurosh e investuar në Kosovë ndahet në disa kategori sipas aktivitetit ekonomik, del se pjesën më të madhe të saj e përbëjnë “Aktivitetet e patundshmrisë”, me 335.7 milionë euro, shkruan Albinfo.ch.

Kjo shumë e lartë e investimeve të huaja në sektorin e patundshmërisë, kryesisht i atribuohet diasporës së Kosovës, e cila investon mjete të konsiderueshme financiare në ndërtimin e shtëpive dhe në blerjen e banesave.

Sidoqoftë, pas blerjes së banesave e shtëpive, në vendin e dytë me investime renditen “Aktivitetet financiare dhe të sigurisë”, me 102.4 milionë euro. I treti për nga vlera e investuar renditet sektori i “Informacion dhe komunikim”, me 16.1 milionë euro, ndërsa kategoritë e tjera kanë investime nën 10 milionë euro, raporton Albinfo.ch.

Ndryshe, ndër sektorët të cilët konsiderohen se mund të gjenerojnë vende pune dhe zhvillim ekonomik janë: sektori i prodhimit, bujqësisë, minierave, transportit dhe telekomunikacionit, industrisë përpunuese dhe turizmi etj.

Ajo që duhet të theksohet këtu është vlera shumë e ulët e investimeve të huaja direkte në sektorin e prodhimit, e cila është vetëm 2.9 milionë euro dhe ajo e sektorit të bujqësisë, pylltarisë e peshkatarisë që arrin vetëm 1.1 milionë euro investime për 11 muaj të vitit 2021.

Investimet sipas shteteve, prin Gjermania

Në kategorizimin e investimeve sipas shteteve, Gjermania prin me 139.5 milionë euro nga vlera e përgjithshme e investimeve prej 485.4 milionësh. Pas saj vjen në radhë Zvicra, me 88.7 milionë euro.

Austria dhe Shtetet e Bashkuara të Amerikës qëndrojnë në nivel thuajse të ngjashëm me vlerën e investimeve në Kosovë, me 51.2 milionë euro nga Austria dhe 51 milionë euro nga SHBA-ja, thuhet në raportin e BQK-së, raporton Albinfo.ch.

Pas këtyre vijnë shtetet si Shqipëria me 39.5 milionë euro të investimeve në Kosovë, Sllovenia me 23.2 milionë, Turqia me 13.6 milionë, dhe shtete e tjera me investime nën 10 milionë euro.

Ndryshe, albinfo.ch ka kontaktuar Ministrinë e Industrisë, Tregtisë dhe Ndërmarrësisë si dhe Agjencinë për Investime dhe Përkrahje të Ndërmarrjeve në Kosovë (KIESA) lidhur me investimet e huaja direkte, orientimin e tyre në sektor strategjikë, numrin e kompanive të huaja që kanë investuar në vend gjatë vitit 2021, por ata nuk i janë përgjigjur pyetjeve deri në publikimin e këtij teksti./Albinfo.ch

---